Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 43.16 | Dem. 43.19 (English) | >>Dem. 43.22 |
43.18τὸ μὲν οὖν πρῶτον διενοήθην , ὦ ἄνδρες δικασταί , γράψας ἐν πίνακι ἅπαντας τοὺς συγγενεῖς τοὺς Ἁγνίου , οὕτως ἐπιδεικνύειν ὑμῖν καθʼ ἕκαστον · ἐπειδὴ δὲ ἐδόκει οὐκ <ἂν > εἶναι ἐξ ἴσου ἡ θεωρία ἅπασι τοῖς δικασταῖς , ἀλλʼ οἱ πόρρω καθήμενοι ἀπολείπεσθαι , ἀναγκαῖον ἴσως ἐστὶν τῷ λόγῳ διδάσκειν ὑμᾶς · τοῦτο γὰρ ἅπασι κοινόν ἐστιν . πειρασόμεθα δὲ καὶ ἡμεῖς ὡς ἂν μάλιστα δυνώμεθα διὰ βραχυτάτων ἐπιδεῖξαι περὶ τοῦ γένους τοῦ Ἁγνίου .
Βούσελος γὰρ ἦν ἐξ Οἴου , ὦ ἄνδρες δικασταί , καὶ τούτῳ ἐγένοντο πέντε υἱεῖς , Ἁγνίας καὶ Εὐβουλίδης καὶ Στρατίος καὶ Ἅβρων καὶ Κλεόκριτος . καὶ οὗτοι ἅπαντες οἱ τοῦ Βουσέλου υἱεῖς ἄνδρες ἐγένοντο , καὶ διένειμεν αὐτοῖς τὴν οὐσίαν ὁ πατὴρ Βούσελος ἅπασιν καλῶς καὶ δικαίως , ὥσπερ προσῆκεν . νειμάμενοι δὲ τὴν οὐσίαν , γυναῖκα αὐτῶν ἕκαστος ἔγημεν κατὰ τοὺς νόμους τοὺς ὑμετέρους , καὶ παῖδες ἐγένοντο αὐτοῖς ἅπασιν καὶ παίδων παῖδες , καὶ ἐγένοντο πέντε οἶκοι ἐκ τοῦ Βουσέλου οἴκου ἑνὸς ὄντος , καὶ χωρὶς ἕκαστος ᾤκει τὸν ἑαυτοῦ ἔχων καὶ ἐγγόνους ἑαυτοῦ ποιούμενος .
43.20περὶ μὲν οὖν τῶν τριῶν ἀδελφῶν τῶν τοῦ Βουσέλου υἱέων , καὶ τῶν ἐγγόνων τῶν τούτοις γενομένων , τί ἂν ἐγὼ <ἢ > ὑμῖν , ὦ ἄνδρες δικασταί , πράγματα παρέχοιμι ἢ ἐμαυτῷ , ἐξηγούμενος περὶ ἑκάστου ; ὄντες γὰρ ἐν τῷ αὐτῷ γένει Θεοπόμπῳ καὶ προσήκοντες ὁμοίως τῷ Ἁγνίᾳ , οὗ ἐστιν ὁ κλῆρος , οὐδεὶς αὐτῶν οὔτε πρότερον πώποτε οὔτε νῦν ἠνώχλησεν ἡμῖν , οὐδʼ ἠμφεσβήτησεν οὔτε τοῦ κλήρου τοῦ Ἁγνίου οὔτε τῆς γυναικὸς τῆς ἐπικλήρου , ἣν ἐγὼ ἔχω ἐπιδικασάμενος , ἡγούμενοι οὐδʼ ὁτιοῦν προσήκειν ἑαυτοῖς οὐδενὸς τῶν Ἁγνίου .
43.19
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 43.16 | Dem. 43.19 (English) | >>Dem. 43.22 |